మలయాళ సినీ ఇండస్ట్రీ ఈ మధ్యకాలంలో అద్భుతమైన ఫేజ్ లో ఉంది. 2018, మంజుమ్మెల్ బాయ్స్, తుదరుం వంటి సినిమాలు మలయాళ కథలు కూడా ఎంత దూరం ప్రయాణించగలవో, బాక్సాఫీస్ వద్ద ఎన్ని భారీ కలెక్షన్స్ తెచ్చుకోగలవో నిరూపించాయి. ప్రతి సారి ఒక సినిమా రికార్డ్ సృష్టిస్తే, వెంటనే ఇంకో సినిమా దాన్ని బ్రేక్ చేయడం మలయాళ సినీ ప్రపంచంలో ట్రెండ్ గా మారింది.
ఇప్పుడు ఆ రికార్డ్స్ అంతా దాటి వెళ్లింది ‘లోకహ్: ఛాప్టర్ వన్ – చంద్ర’ సినిమా. డామినిక్ అరుణ్ దర్శకత్వం వహించి, దుల్కర్ సల్మాన్ నిర్మించిన ఈ సినిమా కేవలం ఆరు వారాల్లోనే ₹300 కోట్ల వసూళ్లను దాటేసింది. సుమారు ₹30 కోట్ల బడ్జెట్తో తీసిన ఈ సినిమా, మోహన్లాల్ ఎంపురాన్ ను దాటేసి, మలయాళ సినీ చరిత్రలో అత్యధిక వసూళ్లు సాధించిన చిత్రంగా నిలిచింది.
గుర్తుంచుకోండి — 2016లో మోహన్లాల్ పులిమురుగన్ ₹100 కోట్ల మార్క్ను అందుకుంది. ఆ తర్వాత 2024లో మంజుమ్మెల్ బాయ్స్ ₹200 కోట్లను దాటింది. ఇప్పుడు లోకహ్ ₹300 కోట్ల మైలురాయిని తాకింది. ఆశ్చర్యకరమైన విషయం ఏంటంటే — ఈ మూడు సినిమాలు కూడా తెలుగు రాష్ట్రాల్లో సూపర్ హిట్ అయ్యాయి.
అయితే లోకహ్ విజయాన్ని మరింత ప్రత్యేకంగా చేసిందేమిటంటే — ఇది ఓ ఫిమేల్ ఓరియెంటెడ్ సినిమా. ఈ మూవీ ఇప్పుడు భారతీయ సినీ చరిత్రలో అత్యధిక వసూళ్లు సాధించిన ఫిమేల్ ఓరియెంటెడ్ చిత్రాలలో ఒకటిగా నిలిచింది.
ఈ సినిమాలో కల్యాణి ప్రియదర్శన్ లీడ్ రోల్ పోషించగా, నస్లెన్ ఇంకా చందు సలీంకుమార్ ముఖ్య పాత్రల్లో నటించారు. ఇది ఐదు భాగాలుగా తెరకెక్కబోయే పెద్ద ఫ్రాంచైజ్లో మొదటి భాగం మాత్రమే. అంతేకాదు, లోకహ్: ఛాప్టర్ వన్ – చంద్ర ద్వారా మలయాళ సినిమా తొలి మహిళా సూపర్ హీరోగా కల్యాణి ప్రియదర్శన్ స్క్రీన్ పై కనిపించింది.
మొత్తానికి, లోకహ్ సినిమా మలయాళ సినీ పరిశ్రమను కొత్త ఎత్తుకు చేర్చింది… ప్రపంచవ్యాప్తంగా సక్సెస్ సృష్టిస్తూ, మహిళా కథానాయకత్వ సినిమాలకు కొత్త దారిని చూపించింది.
