మెగాస్టార్ మన శంకర వర ప్రసాద్ కి బుక్ మై షో లో రివ్యూస్ ఇవ్వడం కుదరదు…

చాలా కాలంగా సినీ నిర్మాతలను వేధిస్తున్న ఒక పెద్ద సమస్య ఉంది. అదే బుక్‌మైషో (BookMyShow) లో రేటింగ్స్, రివ్యూల దుర్వినియోగం. టికెట్ కొనకుండానే ఎవరికైనా రివ్యూ పెట్టే అవకాశం ఉండటంతో, ఈ లోపాన్ని కొంతమంది వ్యాపారంగా మార్చుకున్నాయన్న ఆరోపణలు చాలాకాలంగా వినిపిస్తున్నాయి. బాట్స్, సమన్వయంతో చేసిన క్యాంపెయిన్ల ద్వారా సినిమాలను కావాలనే నెగటివ్‌గా లేదా అతి పాజిటివ్‌గా చూపించే ప్రయత్నాలు జరిగాయి.

ఈ సమస్యపై నిర్మాతలు పలుమార్లు ఆందోళన వ్యక్తం చేశారు. ఇటీవల ఒక సినిమా ఈ రకమైన రేటింగ్ దాడుల వల్ల తీవ్రంగా నష్టపోయినప్పుడు, ఆ సినిమా మేకర్స్ తమ ఆగ్రహం, నిరాశను బహిరంగంగా వెల్లడించారు. గతంలో నిర్మాత నాగ వంశీ కూడా ఒక ఇంటర్వ్యూలో, రేటింగ్ మానిప్యులేషన్ నుంచి సినిమాలను కాపాడుకోవడానికి నిర్మాతలు డబ్బులు ఖర్చు చేయాల్సిన పరిస్థితి ఉందని చెప్పిన విషయం తెలిసిందే.

ఇప్పుడు ఈ అంశంలో కొత్త మలుపు వచ్చింది. త్వరలో విడుదల కాబోతున్న ‘మన శంకర వర ప్రసాద్ గారు’ సినిమాకు సంబంధించి బుక్‌మైషో కీలక నిర్ణయం తీసుకుంది. ఈ సినిమాకు రేటింగ్స్, రివ్యూలను పూర్తిగా నిలిపివేస్తూ ప్లాట్‌ఫామ్‌పై ఒక నోటీసును కూడా ప్రదర్శించింది. ఈ నిర్ణయం కోర్టు ఆదేశాల మేరకు తీసుకున్నదని బుక్‌మైషో స్పష్టంగా పేర్కొంది.

ఈ నిర్ణయంతో ‘మన శంకర వర ప్రసాద్ గారు’ సినిమాపై ఇక బాట్స్ లేదా ఫేక్ అకౌంట్లు అతి నెగటివ్ లేదా అతి పాజిటివ్ రేటింగ్స్ ఇవ్వలేని పరిస్థితి ఏర్పడింది. ఈ మార్పు వెనుక ఉన్న ప్లానింగ్, లీగల్ ప్రాసెస్ కొన్ని వారాలుగా సాగి, చివరికి అమల్లోకి వచ్చిందని సమాచారం.

ఈ విషయంలో ముందడుగు వేసి సహకరించినందుకు Ai Plex ఇంకా Blocking Big సంస్థలకు నిర్మాతలు కృతజ్ఞతలు తెలిపారు. సినిమా నిర్మాణ సంస్థ షైన్ స్క్రీన్స్ బహిరంగంగా వారికి ధన్యవాదాలు తెలియజేసింది.

గతంలో బుక్‌మైషో రేటింగ్స్‌ను కొందరు యాంటీ ఫ్యాన్స్ సినిమాలను దెబ్బతీయడానికి వాడుకున్న సందర్భాలు ఉన్నాయి. మరోవైపు, కొన్ని సగటు సినిమాలు అతి ఎక్కువ రేటింగ్స్ వల్ల లాభపడటం, ఆ తర్వాత భారీ OTT ఇంకా శాటిలైట్ డీల్స్ దక్కించుకోవడం కూడా జరిగింది. ఈ రెండు కోణాల్లో చూసినా, ఇప్పుడు తీసుకున్న ఈ నిర్ణయం ఆరోగ్యకరమైన, అవసరమైన మార్పుగా సినీ వర్గాలు భావిస్తున్నాయి.

టికెట్ బుకింగ్ ప్లాట్‌ఫామ్ పని టికెట్లు అమ్మడమే కానీ, నియంత్రణలేని రివ్యూలు, బాట్స్ ద్వారా సినిమా భవితవ్యాన్ని ప్రభావితం చేయడం కాదు. ఇతర సినిమాలకు రేటింగ్స్ కొనసాగుతున్నా, ‘మన శంకర వర ప్రసాద్ గారు’ సినిమా ఒక కొత్త దారిని చూపించింది అని చెప్పవచ్చు.