శ్రీకాకుళం జిల్లా కాశీబుగ్గలోని శ్రీ వెంకటేశ్వర స్వామి ఆలయం ఆదివారం ఉదయం విషాదంలో మునిగిపోయింది. ఏకాదశి కావడంతో వేకువజామునుంచే భక్తులు భారీగా తరలివచ్చారు. ఈ క్రమంలో ఆలయ ప్రాంగణంలో తొక్కిసలాట జరగడంతో 9 మంది భక్తులు మృతి చెందగా, పలువురు తీవ్రంగా గాయపడ్డారు. కొందరి పరిస్థితి విషమంగా ఉందని సమాచారం. ఒక్కసారిగా భక్తుల రద్దీ పెరగడం, రైలింగ్‌లు విరగిపోవడంతో జనం ముందుకు దూసుకెళ్లడం ఈ దుర్ఘటనకు కారణమైంది.
దుర్ఘటన తర్వాత రెస్క్యూ సిబ్బంది, పోలీసులు తక్షణమే సంఘటనా స్థలానికి చేరుకుని క్షతగాత్రులను ఆసుపత్రులకు తరలించారు. ఆలయంలో దర్శనాలు తాత్కాలికంగా నిలిపివేసి పరిస్థితిని అదుపులోకి తెచ్చే ప్రయత్నాలు జరుగుతున్నాయి. మృతుల్లో ఎక్కువమంది మహిళలే ఉన్నట్లు అధికారులు తెలిపారు. తమ కుటుంబ సభ్యులు క్షేమంగా లేరనే వార్త విన్న భక్తుల బంధువులు కన్నీటి పర్యంతమయ్యారు.
ఈ ఘటనపై రాష్ట్ర రాజకీయ నాయకులు తీవ్ర దిగ్భ్రాంతి వ్యక్తం చేశారు. రాష్ట్ర మంత్రి కింజరాపు అచ్చెన్నాయుడు వెంటనే కాశీబుగ్గకు బయలుదేరి, గాయపడిన వారికి మెరుగైన వైద్యం అందించాలని అధికారులను ఆదేశించారు. ముఖ్యమంత్రి నారా చంద్రబాబు నాయుడు, మంత్రి నారా లోకేష్, దేవాదాయ శాఖ మంత్రి ఆనం రామనారాయణ రెడ్డి మృతుల కుటుంబాలకు సానుభూతి తెలిపారు.
కాశీబుగ్గ ఆలయంలో జరిగిన ఈ ఘోర ఘటన మరోసారి భక్తుల భద్రతపై ఆలోచన అవసరమని గుర్తుచేస్తోంది. భక్తి ఉత్సాహం విషాదంగా మారకూడదంటే, భవిష్యత్తులో తగిన భద్రతా చర్యలు తప్పనిసరి అని ప్రజల అభిప్రాయం.
