ప్రముఖ కన్నడ నటుడు హరిష్ రాయ్ గురువారం (నవంబర్ 6)న బెంగళూరులో కన్నుమూశారు. గత కొన్నేళ్లుగా ఆయన థైరాయిడ్ క్యాన్సర్‌తో పోరాడుతున్నారు. కిడ్వాయి క్యాన్సర్ హాస్పిటల్‌లో చికిత్స పొందుతున్నప్పటికీ, ఇటీవల ఆయన ఆరోగ్యం మరింత క్షీణించింది.
1990s లో నటనా ప్రస్థానం ప్రారంభించిన హరిష్ రాయ్, కన్నడ సినిమా ప్రేక్షకులకు అత్యంత పరిచితమైన నటుడిగా నిలిచారు. ఓం, నల్లా, రాజ్ బహద్దూర్, సంజు వెడ్స్ గీత ఇంకా ముఖ్యంగా కేజీఎఫ్ సిరీస్‌లలో ఆయన చేసిన శక్తివంతమైన నటనను అభిమానులు ఎప్పటికీ గుర్తుంచుకుంటారు.
తన చివరి రోజుల్లో ఆరోగ్య సమస్యలు, ఆర్థిక ఇబ్బందుల గురించి ఆయన బహిరంగంగా చెప్పుకొచ్చారు. ఆయన చికిత్స కోసం కేజీఎఫ్ హీరో యష్ సహా చాలామంది సినీ ప్రముఖులు ముందుకొచ్చి సహాయం చేశారు.
మూడు దశాబ్దాల కాలంలో హరిష్ రాయ్ తెరపై చాలా మంచి పాత్రలను పోషించినప్పటికీ, వ్యక్తిగతంగా ఎంతో వినయంగా, మంచితనంతో జీవించిన వ్యక్తిగా అందరూ గుర్తించారు. ఆయన మరణం కన్నడ సినీ పరిశ్రమకు పెద్ద నష్టం.
