మన ఇంట్లో శాంతి, సౌఖ్యం, ఆధ్యాత్మిక ఆనందం నిలవాలంటే పూజాగది ఏర్పాటు ఎంతో కీలకం. వాస్తు శాస్త్రం ప్రకారం పూజామందిరం ఇంటికి ఆత్మవంటిది. అక్కడి నుంచి ప్రవహించే సాత్విక శక్తే ఇంటి మొత్తం వాతావరణాన్ని ప్రభావితం చేస్తుంది. అందుకే పూజాగది నిర్మాణంలో, స్థల ఎంపికలో అత్యంత జాగ్రత్త అవసరం.
చాలా మంది స్థలాభావం కారణంగా వంటగది పక్కనే పూజామందిరం ఏర్పాటు చేస్తుంటారు. కానీ ఇది వాస్తు ప్రకారం అనుకూలం కాదని శాస్త్రం చెబుతోంది. వంటగదిలో అగ్ని తత్వం అధికంగా ఉండటం వల్ల అక్కడ నుంచి రజోగుణం, తమోగుణ శక్తులు వెలువడతాయి. పూజాగది నుంచి మాత్రం సాత్వికమైన, దైవికమైన శక్తి ప్రవహిస్తుంది. ఈ రెండు విభిన్న శక్తులు సమీపంలో ఉంటే పరస్పర సంఘర్షణ ఏర్పడి ఇంట్లో ప్రతికూల వాతావరణం పెరుగుతుంది. దాని ప్రభావంగా ఆరోగ్య సమస్యలు, ఆర్థిక అడ్డంకులు, కుటుంబ కలహాలు తలెత్తే అవకాశముంటుంది.
వాస్తు శాస్త్రం ప్రకారం పూజాగదిని ఈశాన్య దిశలో (ఈశాన్య కోణం) ఏర్పాటు చేయడం అత్యంత శుభప్రదం. అది సాధ్యంకాకపోతే తూర్పు లేదా ఉత్తర దిశలో ఏర్పాటు చేయవచ్చు. పూజ చేసే వ్యక్తి తూర్పు లేదా ఉత్తర ముఖంగా కూర్చుని ప్రార్థనలు చేయాలి.
పూజాగదిలో ఒకే దేవుడి రెండు విగ్రహాలు లేదా చిత్రాలు ఉంచరాదు. పూర్వీకుల ఫోటోలు పూజాగదిలో పెట్టకూడదు. అవి ఇంట్లో వేరే చోట, దక్షిణ దిశలో ఉంచడం శ్రేయస్కరం. శివలింగం, గణపతి, కుటుంబ దేవతలను శాస్త్రోక్తంగా ప్రతిష్ఠించి, నిత్యం భక్తితో పూజ చేస్తే ఇంట్లో శాంతి, ఐశ్వర్యం, దైవానుగ్రహం నిలకడగా ఉంటుంది.
