ఆంధ్రప్రదేశ్ భవిష్యత్ అభివృద్ధి చర్చలో ఈరోజు కేంద్రబిందువుగా మారింది విశాఖపట్నం. రాష్ట్ర విభజన తర్వాత హైదరాబాద్ తెలంగాణకు పరిమితమవడంతో, ఆంధ్రప్రదేశ్కు ఆర్థికంగా ముందుకు నడిపించే ఒక పెద్ద నగరం అవసరం ఏర్పడింది. ఆ లోటును భర్తీ చేసే నగరంగా ఇప్పుడు విశాఖపట్నం ఎదుగుతోంది. రాష్ట్రంలోనే అతిపెద్ద మహానగరంగా ఉన్న విశాఖ, ప్రస్తుతం అభివృద్ధికి ప్రతీకగా మారింది.
కేంద్ర, రాష్ట్ర ప్రభుత్వాల సమన్వయంతో విశాఖలో మౌలిక సదుపాయాల అభివృద్ధి వేగంగా సాగుతోంది. సహజసిద్ధమైన నౌకాశ్రయం ఉండటం వల్ల విశాఖ ఇప్పటికే లాజిస్టిక్ హబ్గా గుర్తింపు పొందింది. అదే సమయంలో ఐటీ రంగంలోకి కూడా నగరం బలంగా అడుగుపెడుతోంది. గూగుల్ సంస్థ విశాఖ సమీపంలోని తారలువాడ ప్రాంతంలో భారీ డేటా సెంటర్ ఏర్పాటు చేయడానికి ముందుకు రావడం విశేషం. ఇది ఆసియా ఖండంలోనే అతిపెద్ద డేటా సెంటర్గా నిలవనుందని నిపుణులు చెబుతున్నారు. దీంతో విశాఖ ఐటీ మ్యాప్లో కీలక స్థానాన్ని దక్కించుకునే అవకాశాలు పెరిగాయి.
మరోవైపు భోగాపురంలో నిర్మిస్తున్న అంతర్జాతీయ విమానాశ్రయం ట్రయల్ రన్ను విజయవంతంగా పూర్తి చేసుకుని, త్వరలోనే పౌర విమాన సేవలు ప్రారంభించనుంది. ఇది విశాఖకు గ్లోబల్ కనెక్టివిటీని మరింత పెంచే అంశంగా భావిస్తున్నారు. స్మార్ట్ సిటీ ప్రాజెక్టుల కింద మౌలిక వసతులు మెరుగుపడుతుండటం కూడా నగర అభివృద్ధికి తోడ్పడుతోంది.
ఈ సమగ్ర అభివృద్ధి ప్రభావం రియల్ ఎస్టేట్ రంగంపై స్పష్టంగా కనిపిస్తోంది. గ్రేటర్ విశాఖపట్నం పరిధిలో భూముల ధరలు గణనీయంగా పెరిగాయి. కొన్ని ప్రాంతాల్లో చదరపు గజం ధరలు రూ.50 వేల నుంచి లక్ష రూపాయల వరకూ పలుకుతున్నాయి. రాబోయే ఐదు నుంచి పది సంవత్సరాల్లో విశాఖ తూర్పు తీరంలో చెన్నై తర్వాత అతిపెద్ద మహానగరంగా ఎదగడమే కాకుండా, ముంబై స్థాయిలో వాణిజ్య నగరంగా మారే అవకాశాలున్నాయని వ్యాపార వర్గాలు అంచనా వేస్తున్నాయి.
