ప్రపంచంలో అత్యంత విలువైన లోహాల్లో బంగారం ఎప్పటికీ ప్రత్యేక స్థానాన్ని నిలుపుకుంటోంది. కాలం మారినా దాని మెరుపు తగ్గలేదు, ప్రాధాన్యం తగ్గలేదు. ఒకప్పుడు రాజులు–మహారాజుల సంపదకు చిహ్నంగా ఉన్న బంగారం, ఇప్పుడు సామాన్యుడి పెట్టుబడిగా మారింది. దేశాల ఆర్థిక బలాన్ని అంచనా వేయడంలో కూడా బంగారు నిల్వలు కీలక సూచికగా పరిగణిస్తారు. అందుకే ప్రపంచంలో అత్యధికంగా బంగారం ఎక్కడ లభిస్తోంది? ‘బంగారు భూమి’గా ఏ దేశాన్ని పిలుస్తారు? అన్న ప్రశ్నలు ఆసక్తికరంగా మారాయి.
భారతదేశానికి వస్తే బంగారం కేవలం ఆభరణం కాదు… అది సంప్రదాయం, సంస్కృతి, నమ్మకానికి ప్రతీక. పెళ్లిళ్లు, పండుగలు, శుభకార్యాలు అంటే బంగారం తప్పనిసరి. ఈ కారణంగానే భారత్ ప్రపంచంలో అతిపెద్ద బంగారు వినియోగ దేశాల్లో ఒకటిగా నిలిచింది. అయితే బంగారం ఉత్పత్తి విషయంలో భారత్ ముందుండదు. చాలామంది దుబాయ్ లేదా గల్ఫ్ దేశాల్లో బంగారం అధికంగా ఉత్పత్తి అవుతుందని భావిస్తారు. నిజానికి అక్కడ బంగారం చౌకగా లభించడానికి కారణం పన్నులు తక్కువగా ఉండటమే తప్ప, భారీ ఉత్పత్తి కాదు.
ప్రపంచంలో ‘బంగారు భూమి’గా ప్రసిద్ధి చెందిన దేశం ఘనా. పశ్చిమ ఆఫ్రికాలోని ఈ దేశానికి అపారమైన బంగారు వనరులు ఉన్నాయి. చరిత్రలో అరబ్ వ్యాపారులు ఘనాను ‘గోల్డ్ కోస్ట్’గా పిలిచేవారు. అక్కడ బంగారం వాణిజ్యం శతాబ్దాలుగా కొనసాగుతోంది. అలాగే జపాన్లోని సాడో ద్వీపం కూడా ఒకప్పుడు బంగారు భూమిగానే పేరొందింది. ఎడో కాలంలో జపాన్లో ఉత్పత్తి అయ్యే బంగారంలో సగానికి పైగా ఇక్కడినుంచే వచ్చేది. ఇండోనేషియాలోని పురాతన శ్రీవిజయ సామ్రాజ్య ప్రాంతాలు కూడా బంగారు ద్వీపంగా గుర్తింపు పొందాయి.
ప్రస్తుత ప్రపంచ పరిస్థితులను చూస్తే బంగారానికి మరింత డిమాండ్ పెరుగుతోంది. అమెరికా మాజీ అధ్యక్షుడు డొనాల్డ్ ట్రంప్ విధించిన సుంకాలు, అంతర్జాతీయ మార్కెట్లలో నెలకొన్న అనిశ్చితి స్టాక్ మార్కెట్లను కుదిపేస్తున్నాయి. ఇలాంటి వేళ పెట్టుబడిదారులు సురక్షిత ఆశ్రయంగా బంగారాన్ని ఎంచుకుంటున్నారు. దీని ప్రభావంతో బంగారం ధరలు కొత్త గరిష్టాలను తాకుతున్నాయి. మారుతున్న ప్రపంచ ఆర్థిక పరిస్థితుల్లో బంగారం మరోసారి తన విలువను నిరూపించుకుంటోంది.
