రథసప్తమి… సూర్యారాధనకు అగ్రస్థానం కలిగిన మహాపర్వదినం. ఆ రోజు అరసవల్లి శ్రీ సూర్యనారాయణ స్వామి సన్నిధిలో జరిగే క్షీరాభిషేకం దర్శనం అనుభవించడం భక్తులకు జీవితకాల స్మరణగా నిలుస్తుంది. ఉదయించే సూర్యకిరణాలు ఆలయ గర్భగుడిని తాకే వేళ… “ఆదిత్యాయ నమః” అనే మంత్రోచ్ఛారణతో వాతావరణమంతా ఆధ్యాత్మిక శక్తితో నిండిపోతుంది.
ఈ ఏడాది రథసప్తమి సందర్భంగా అరసవల్లికి సుమారు రెండు లక్షల మందికి పైగా భక్తులు తరలివస్తారని అధికారులు అంచనా వేస్తున్నారు. భక్తులకు ఎలాంటి ఇబ్బందులు కలగకుండా దర్శనాన్ని సులభతరం చేయాలనే ఉద్దేశంతో ప్రభుత్వం ఆన్లైన్ స్లాట్ దర్శన విధానాన్ని అమలు చేస్తోంది. ముందుగా టికెట్లు బుక్ చేసుకుంటే నిర్ణయించిన సమయానికే స్వామివారి దర్శనం లభించే అవకాశం ఉంటుంది.
భక్తులు తమ దర్శన టికెట్లను దేవదాయ శాఖ అధికారిక వెబ్సైట్ aptemples.ap.gov.in ద్వారా బుక్ చేసుకోవచ్చు. వెబ్సైట్లో ‘Devotee Services’ విభాగంలోకి వెళ్లి అరసవల్లి శ్రీ సూర్యనారాయణ స్వామి ఆలయాన్ని ఎంచుకుని, రథసప్తమి ప్రత్యేక దర్శనం లేదా క్షీరాభిషేక సేవను సెలెక్ట్ చేయాలి. ఆధార్ వివరాలు, మొబైల్ నంబర్ నమోదు చేసిన తర్వాత టికెట్ కన్ఫర్మ్ అవుతుంది. మొబైల్కు వచ్చే సందేశం లేదా డౌన్లోడ్ చేసిన టికెట్ను ఆలయం వద్ద చూపించాలి. స్మార్ట్ఫోన్ వినియోగదారులు ‘Manmitra’ యాప్ ద్వారా కూడా సులభంగా టికెట్లు పొందవచ్చు.
రథసప్తమి రోజున జరిగే క్షీరాభిషేక సేవకు రూ.500 టికెట్ ధరగా నిర్ణయించారు. అదేవిధంగా రూ.100, రూ.500 ప్రత్యేక దర్శన టికెట్లు కూడా అందుబాటులో ఉన్నాయి. ఆలయ సంప్రదాయం ప్రకారం ఇంద్ర పుష్కరిణిలో పవిత్ర స్నానం ఆచరించి స్వామివారిని దర్శించుకుంటే ఆధ్యాత్మిక ఫలితం మరింతగా లభిస్తుందని భక్తుల నమ్మకం.
జనవరి 25 అర్ధరాత్రి నుంచే నిజరూప దర్శనం ప్రారంభమవుతుండగా, జనవరి 19 నుంచి 25 వరకు వారం రోజులపాటు అరసవల్లిలో ఆధ్యాత్మిక, సాంస్కృతిక కార్యక్రమాలు జరగనున్నాయి. సూర్య నమస్కారాలు, సంగీత కార్యక్రమాలు, డ్రోన్ షో వంటి ప్రత్యేక ఆకర్షణలు భక్తులను మరింతగా ఆకట్టుకోనున్నాయి. రద్దీని దృష్టిలో ఉంచుకుని ముందస్తుగా టికెట్లు బుక్ చేసుకుని, సూర్యభగవానుడి కృపను పొందేందుకు సిద్ధం కావడం శ్రేయస్కరం.
