గాయని చిన్మయి ఎప్పుడూ తన నమ్మకాలు, సిద్ధాంతాల విషయంలో స్ట్రాంగ్ గా నిలబడే వ్యక్తిగా గుర్తింపు పొందారు. పరిస్థితులు ఎలా ఉన్నా, తాను నమ్మిన దాని కోసం గట్టిగా నిలబడడం ఆమె స్వభావం. గతంలోనే, ద్రౌపది 2 సినిమాలోని “ఎంకోనీ” పాటను పాడినప్పుడు, ఆ సినిమా కథ లేదా నేపథ్యం తనకు తెలియదని చిన్మయి స్పష్టంగా వెల్లడించారు.
తర్వాత ద్రౌపది 2 సినిమా ‘మూడ్రం వల్లల్ల మహారాజా’ అనే చరిత్ర గ్రంథంపై ఆధారపడి ఉందని తెలుసుకున్న వెంటనే, చిన్మయి ఒక బహిరంగ క్షమాపణ ప్రకటన విడుదల చేశారు. తన ఆలోచనలకు, పాటకు ఉన్న సందర్భానికి పొంతన లేదని ఆమె తెలిపారు. అంతేకాకుండా, ఈ పరిస్థితిలో తన వల్ల సంగీత దర్శకుడు ఘిబ్రాన్ ఇబ్బందికి గురయ్యాడని భావిస్తూ, ఆయనకు కూడా క్షమాపణలు చెప్పారు.
చిన్మయి ప్రకటన అనంతరం, ద్రౌపది 2 నిర్మాతలు కీలక నిర్ణయం తీసుకున్నారు. “ఎంకోనీ” పాటలో చిన్మయి గాత్రాన్ని తొలగించి, మరో గాయనితో ఆ పాటను మళ్లీ రికార్డ్ చేయాలని నిర్ణయించారు. విడుదలయ్యే ఫైనల్ ప్రింట్లో కొత్త వాయిస్ మాత్రమే ఉంటుందని వారు అధికారికంగా ప్రకటించారు.
దర్శకుడు మోహన్ జీ ఇచ్చిన ప్రకటనతో ఈ వివాదానికి ముగింపు పలికినట్టయింది. అయితే, చిన్మయి వ్యాఖ్యల తర్వాత ద్రౌపది 2 టీమ్ ఇంకా దర్శకుడు ప్రజా విమర్శలకు గురయ్యారు. చివరికి, ఇరుపక్షాలు పరస్పర అంగీకారంతో ఈ అంశాన్ని ముగించారు.
ఇప్పటికే ద్రౌపది 2 సెన్సార్ బోర్డు నుంచి అనుమతి పొందింది. ఈ సినిమా త్వరలోనే థియేటర్లలో ప్రేక్షకుల ముందుకు రానుంది.
