ఇటీవల కమల్ హాసన్ తన Personality Rights పరిరక్షణ కోసం మద్రాస్ హైకోర్టును ఆశ్రయించారు. తన చిత్రాలు, రూపం, పేరును అనుమతి లేకుండా వాణిజ్య ప్రయోజనాల కోసం ఉపయోగించడం, అలాగే అక్రమంగా మెర్చండైజ్ తయారు చేసి విక్రయించడంపై నిషేధం విధించాలని ఆయన కోర్టును కోరారు. ఈ పిటిషన్పై తాజాగా మద్రాస్ హైకోర్టు కీలక తీర్పును వెలువరించింది.
ప్రజాదరణ పొందిన ప్రముఖుల పట్ల సాధారణ ప్రజలకు ఉండే ఆసక్తి తెలిసిందే. వారి ఫోటోలు, వీడియోలు ఉపయోగించి తమ అభిప్రాయాలను, సృజనాత్మకతను వ్యక్తపరచాలనుకోవడం ఈ రోజుల్లో సాధారణమైపోయింది. ముఖ్యంగా సోషల్ మీడియాలో కొందరు అభిమానులు ప్రేమతోనే నటుల ముఖాలను ఉపయోగించి వ్యంగ్య చిత్రాలు (సాటైర్), కారికేచర్లు రూపొందిస్తుంటారు. ఇవి చాలా సందర్భాల్లో హానికరం కాకపోవడం గమనార్హం. ఈ నేపథ్యంలో కోర్టు ఇచ్చిన తాజా నిర్ణయం సృజనాత్మక వ్యక్తీకరణకు అనుకూలంగా ఉందని పలువురు అభిప్రాయపడుతున్నారు.
ఈ కేసులో కమల్ హాసన్ తరఫున వాదించిన సీనియర్ కౌన్సెల్, మార్ఫ్ చేసిన ఫోటోలు తన క్లయింట్ ప్రతిష్టకు, సెలబ్రిటీగా ఉన్న ఇమేజ్కు అపార నష్టం కలిగిస్తున్నాయని కోర్టు దృష్టికి తీసుకువచ్చారు. అలాగే కమల్ హాసన్ పేరు, చిత్రాన్ని ఆయన అనుమతి లేదా ఎండార్స్మెంట్ లేకుండా మెర్చండైజ్పై ఉపయోగిస్తున్నారని కూడా వాదించారు.
ఈ వాదనలను పరిశీలించిన న్యాయస్థానం, ప్రాథమికంగా బలమైన కేసు ఉందని అభిప్రాయపడింది. తదుపరి విచారణ వరకు కమల్ హాసన్కు సంబంధించిన తప్పుడు చిత్రాలను సృష్టించడం లేదా ఏ మాధ్యమం ద్వారా అయినా అవి ప్రచారం చేయడాన్ని ప్రతివాదులు చేయరాదని ఆదేశాలు జారీ చేసింది. అలాగే ఆయన అనుమతి లేకుండా లేదా ఎండార్స్మెంట్ లేకుండా కమల్ హాసన్ పేరు లేదా చిత్రంతో మెర్చండైజ్ విక్రయించకూడదని స్పష్టం చేసింది.
అయితే, ఈ ఆదేశాలు సాటైర్, కారికేచర్ వంటి అనుమతించబడిన సృజనాత్మక వ్యక్తీకరణకు అడ్డుకావని కోర్టు స్పష్టంగా పేర్కొంది. అంటే, కళాత్మకంగా, వ్యంగ్యంగా, హానికరం కాకుండా చేసే వ్యక్తీకరణలు ఈ నిషేధానికి లోబడవు.
ఈ కేసులో ‘జాన్ డో’ను రెండో ప్రతివాదిగా చేర్చాలని కోర్టు ఆదేశించింది. అలాగే ఈ కోర్టు ఉత్తర్వులపై ఆంగ్లం మరియు తమిళ పత్రికల్లో ప్రజా నోటీసు ఇవ్వాలని పిటిషనర్కు సూచించింది.
కమల్ హాసన్ మాత్రమే కాకుండా, ఇటీవలి కాలంలో దేశవ్యాప్తంగా పలువురు నటులు తమ వ్యక్తిత్వ హక్కుల రక్షణ కోసం కోర్టులను ఆశ్రయిస్తున్నారు. అయితే, అక్రమ వినియోగాన్ని నియంత్రిస్తూ, సృజనాత్మక వ్యక్తీకరణకు అవకాశం ఇవ్వడం కోర్టు సమతుల్య నిర్ణయంగా భావిస్తున్నారు.
