ముప్పై వయసు అనగానే చాలామందికి “యువత ముగిసి, వయసు మొదలైంది” అనే భావన కలుగుతుంది. కానీ వాస్తవానికి ఇది ఒక ముగింపు కాదు, కొత్త ఆరంభం. ఈ దశలో శరీరంలో నెమ్మదిగా మార్పులు చోటు చేసుకుంటాయి. మెటబాలిజం తగ్గడం, హార్మోన్ల మార్పులు, ఎముకల బలహీనత, రక్తహీనత, మానసిక ఒత్తిడి వంటి సమస్యలు కనిపిస్తాయి. ప్రత్యేకించి మహిళలలో ఈ మార్పులు మరింత స్పష్టంగా కనిపిస్తాయి.
ఇలాంటి సమయంలో ఆహారపరమైన జాగ్రత్తలు అత్యంత ముఖ్యం. పాలు, రాగులు, నువ్వులు, ఆకుకూరలు, కందులు, పప్పులు వంటి వాటిలో లభించే క్యాల్షియం, విటమిన్ D3, K, మెగ్నీషియం వంటి పోషకాలు ఎముకల బలాన్ని నిలబెడతాయి. సూర్యరశ్మి ద్వారా శరీరానికి సహజంగా విటమిన్ D అందుతుంది. తగినంత నీరు తాగడం, జంక్ ఫుడ్ తగ్గించడం, సమతుల్య ఆహారం తీసుకోవడం…ఇవన్నీ తప్పనిసరి అలవాట్లు కావాలి.
ఇక శారీరక వ్యాయామం ఈ దశలో బలం, చురుకుదనం, మానసిక స్థిరత్వానికి ప్రాణాధారం. రోజూ కనీసం 30 నిమిషాలు నడక, యోగా లేదా ధ్యానం చేస్తే శరీరం మాత్రమే కాదు, మనసు కూడా తేలికపడుతుంది. “మానసిక ప్రశాంతత” అనేది ఆరోగ్యానికి మూలస్థంభం అని వైద్య నిపుణులు చెబుతున్నారు.
ముప్పై వయసు మన జీవితంలో ఆరోగ్యబాటలో ఒక టర్నింగ్ పాయింట్. ఈ సమయంలో తీసుకునే జాగ్రత్తలు, అలవాట్లు మన నలభై, యాభై దశకాల్లో ఆరోగ్యాన్ని స్థిరంగా నిలబెడతాయి. “30 తర్వాత ఆరోగ్యం తగ్గదు, జాగ్రత్త తగ్గితేనే తగ్గుతుంది” అన్న నినాదం నిజంగా జీవన మంత్రంలా తీసుకుంటే, ముప్పై వయసు ఒక కొత్త ఉత్సాహభరిత ఆరంభంగా మారుతుంది.
