భారత రైల్వే చరిత్రలో మరో కీలక అధ్యాయం ప్రారంభమైంది. దేశంలోనే తొలి హైడ్రోజన్ ఇంధనంతో నడిచే రైలు ఈరోజు హర్యానాలోని జింద్–సోనిపట్ మార్గంలో ట్రయల్ రన్ను ప్రారంభించింది. ఈ పరీక్షా పరుగులను రైల్వే శాఖకు చెందిన RDSO పర్యవేక్షిస్తోంది. ఇందులో రైలు వేగం, స్థిరత్వం, ఆసిలేషన్ నియంత్రణ, అత్యవసర పరిస్థితుల్లో బ్రేకింగ్ సామర్థ్యాన్ని అంచనా వేసే EBD ట్రయల్స్ను నిర్వహిస్తున్నారు.
హైడ్రోజన్ రైళ్లు డీజిల్ లేదా విద్యుత్పై ఆధారపడకుండా, హైడ్రోజన్ ఫ్యూయల్ సెల్ సాంకేతికతతో నడుస్తాయి. ఈ ప్రక్రియలో కేవలం నీటి ఆవిరే వెలువడుతుంది. దీంతో కాలుష్యం పూర్తిగా తగ్గి, పర్యావరణానికి మేలు జరుగుతుంది. ఈ ప్రాజెక్ట్తో భారత్ జర్మనీ, స్వీడన్, జపాన్, చైనా సరసన నిలిచి, ప్రపంచంలో హైడ్రోజన్ రైలు సాంకేతికతను స్వీకరించిన ఐదవ దేశంగా గుర్తింపు పొందింది.
భవిష్యత్తులో డీజిల్ రైళ్ల స్థానంలో హైడ్రోజన్ రైళ్లను ప్రవేశపెట్టాలన్నది భారత రైల్వే లక్ష్యం. ఇది దేశాన్ని కార్బన్ న్యూట్రల్ రవాణా వ్యవస్థ వైపు తీసుకెళ్లే కీలక ముందడుగు. శుభ్రమైన, హరిత రైలు ప్రయాణాల దిశగా భారత్ వేసిన ఈ అడుగు భవిష్యత్ తరాలకు మేలుగా నిలవనుంది.
