అయ్యో టైటిల్ చూసి మన తెలుగు బిగ్ బాస్ అనుకునేరు… కాదు ఇది కన్నడ బిగ్ బాస్ అప్డేట్… బెంగళూరు సౌత్లోని బిడది ప్రాంతంలో ఉన్న బిగ్ బాస్ కన్నడ హౌస్పై కర్ణాటక పర్యావరణ నియంత్రణ మండలి (KSPCB) ఆగ్రహం వ్యక్తం చేసింది. సుదీప్ హోస్ట్గా ఉన్న ఈ రియాలిటీ షో ప్రాంగణానికి తక్షణమే మూసివేత ఆదేశాలు జారీ చేసింది.
అక్టోబర్ 6న విడుదలైన ఆ నోటీసులో, ఆ ప్రాంగణం వెల్స్ స్టూడియోస్ అండ్ ఎంటర్టైన్మెంట్ ప్రైవేట్ లిమిటెడ్, అంటే జాలీవుడ్ స్టూడియోస్ అండ్ అడ్వెంచర్స్ పేరుతో కార్యకలాపాలు కొనసాగిస్తున్నట్లు పేర్కొంది. అయితే, వారు పర్యావరణ చట్టాల ప్రకారం అవసరమైన అనుమతులు పొందలేదని మండలి తెలిపింది.
నీటి (Water Act – 1974) ఇంకా గాలి (Air Act – 1981) కాలుష్య నియంత్రణ చట్టాలను ఉల్లంఘించినందున, ఆ ప్రొడక్షన్ సైట్పై కఠిన చర్యలు తీసుకున్నారు. ‘Consent for Establishment’ మరియు ‘Consent for Operation’ అనే అనుమతులు లేకుండానే పెద్ద ఎత్తున షూటింగ్లు, వినోద కార్యక్రమాలు నిర్వహిస్తున్నారని దర్యాప్తులో తేలింది.
దాంతో, KSPCB అధికారులు వెంటనే ఆ ప్రాంగణాన్ని మూసివేసి, అన్ని కార్యకలాపాలను నిలిపివేశారు. రామనగర జిల్లా కలెక్టర్, BESCOM మేనేజింగ్ డైరెక్టర్, స్థానిక విద్యుత్ శాఖ అధికారులను ఆ ఆదేశాల అమలు పర్యవేక్షించమని సూచించారు.
ఈ పరిణామం కర్ణాటక ప్రభుత్వానికి పెద్ద ప్రాముఖ్యత కలిగిన చర్యగా నిలిచింది. హై-ప్రొఫైల్ రియాలిటీ షో అయిన బిగ్ బాస్ కన్నడ పై పర్యావరణ చట్టాలను కచ్చితంగా అమలు చేయడం, భవిష్యత్లో ఇతర ప్రొడక్షన్ యూనిట్లకు కూడా ఒక హెచ్చరికగా మారింది.
మొత్తానికి, ఈ సంఘటన సినీ ఇంకా టెలివిజన్ రంగంలో పర్యావరణ నియమాలకు ప్రాధాన్యం పెరుగుతున్నదనానికి నిదర్శనం.