చైనాకు చెందిన ఓ ప్రముఖ బిజినెస్వుమన్ రూ. 68 కోట్ల కట్నం ఇచ్చి తనకంటే 30 ఏళ్లు చిన్నవాడిని వివాహం చేసుకోవడం ప్రపంచవ్యాప్తంగా చర్చనీయాంశంగా మారింది. సంపద, వయస్సు, వ్యక్తిగత నిర్ణయాలపై సామాజిక మాధ్యమాల్లో పెద్ద ఎత్తున చర్చ జరుగుతోంది.
యు వెన్హాంగ్ అనే ఈ వ్యాపారవేత్త 55 ఏళ్ల వయస్సులో, 25 ఏళ్ల యువకుడు లియు యుచెన్ ను వివాహం చేసుకున్నారు. ఈ పెళ్లి సాధారణం కాదు. వయస్సులో 30 ఏళ్ల తేడా ఉండటం ఒకవైపు అయితే, మరోవైపు రూ. 68 కోట్ల విలువైన కట్నం ఇవ్వడం ఈ వివాహాన్ని ప్రత్యేకంగా నిలిపింది.
హాంకాంగ్ కేంద్రంగా కార్యకలాపాలు నిర్వహిస్తున్న యంగ్ మెర్రీ రియల్ ఇంటర్నేషనల్ గ్రూప్ సంస్థ వ్యవస్థాపకురాలైన యు వెన్హాంగ్ తన వ్యాపార సామ్రాజ్యంతో ప్రసిద్ధి చెందారు. ఆమె కంపెనీలో మోడల్గా పనిచేసిన లియు యుచెన్తో 2025లో పరిచయం ఏర్పడింది. ఆ పరిచయం క్రమంగా ప్రేమగా మారి, 2026 మార్చిలో వైభవంగా వివాహం జరిగింది.
వారి సంబంధం ప్రారంభం నుంచే విలాసవంతంగా సాగింది. డేటింగ్ సమయంలోనే యు వెన్హాంగ్ తన ప్రేమికుడికి రోల్స్ రాయిస్, మెర్సిడెస్ బెంజ్ వంటి లగ్జరీ కార్లను బహుమతిగా ఇచ్చినట్టు సమాచారం. పెళ్లి సమయానికి మాత్రం ఈ బహుమతులు మరింత భారీగా మారాయి. నగదు, ఆస్తులు, విలాసవంతమైన వస్తువులు కలిపి మొత్తం రూ. 68 కోట్లకు పైగా కట్నంగా ఇచ్చినట్టు అంతర్జాతీయ మీడియా పేర్కొంది.
సాధారణంగా పెళ్లికొడుకు కుటుంబం కట్నం తీసుకునే పరిస్థితులు మనం చూస్తుంటాం. కానీ ఇక్కడ మాత్రం పెళ్లికూతురు స్వయంగా భారీ మొత్తంలో కట్నం ఇవ్వడం విశేషం. ఇది సామాజికంగా విభిన్న అభిప్రాయాలకు దారితీసింది. కొందరు దీనిని వ్యక్తిగత స్వేచ్ఛగా భావిస్తుండగా, మరికొందరు సంపద ప్రదర్శనగా విమర్శిస్తున్నారు.
యు వెన్హాంగ్ జీవితం కూడా ఆసక్తికరంగా ఉంటుంది. చైనాలోని లియావోనింగ్ ప్రాంతంలో సాధారణ కుటుంబంలో జన్మించిన ఆమె, చిన్న వయస్సులోనే జీవితంలోని కష్టాలను ఎదుర్కొన్నారు. 18 ఏళ్లకే తండ్రిని కోల్పోయిన ఆమె, కుటుంబ బాధ్యతలు తీసుకుని సౌందర్య రంగంలో అడుగుపెట్టారు. చిన్న బ్యూటీ సలోన్తో ప్రారంభమైన ఆమె ప్రయాణం, నేడు 150కి పైగా బ్రాంచ్లతో అంతర్జాతీయ స్థాయికి చేరింది.
అయితే ఆమె జీవితంలో వివాదాలు కూడా తక్కువగా లేవు. గతంలో సుమారు 4.7 బిలియన్ యువాన్ల ఆదాయాన్ని దాచిపెట్టినట్టు పన్ను ఎగవేత ఆరోపణలు ఎదుర్కొన్నారు. అలాగే ఆమె కంపెనీ ప్రవేశపెట్టిన కొన్ని కాస్మెటిక్ విధానాలపై వైద్య నిపుణులు విమర్శలు వ్యక్తం చేశారు.
ఇక వ్యక్తిగత జీవితం విషయానికి వస్తే, యు వెన్హాంగ్కు ఇది ఆరో వివాహం. గతంలో ఐదు వివాహాలు చేసుకున్న ఆమె, చివరిగా అల్బేనియన్ మోడల్తో దాదాపు 10 సంవత్సరాలు కలిసి జీవించారు. ఆమెకు గత సంబంధాల ద్వారా ఇద్దరు పిల్లలు కూడా ఉన్నారు.
“పురుషులపై ఆధారపడకూడదు, మహిళలు సంపాదించిన డబ్బే వారికి భద్రత” అనే ఆమె వ్యాఖ్యలు గతంలోనే పెద్ద చర్చకు దారితీశాయి. ఇప్పుడు ఆమె తీసుకున్న ఈ నిర్ణయం కూడా అదే ఆలోచనను ప్రతిబింబిస్తుందని కొందరు భావిస్తున్నారు.
