ఆన్లైన్లో చిటికెలో దొరికేసే ‘పర్సనల్ లోన్’ (Personal Loan) చాలా మందికి అత్యవసర సమయాల్లో ఆపద్బాంధవుడిలా కనిపిస్తుంది. ఎలాంటి గ్యారెంటీ, పేపర్ వర్క్ లేకుండా ఖాతాలో డబ్బులు పడిపోవడంతో.. వెనకా ముందు ఆలోచించకుండా చాలామంది వీటి వైపు వెంపర్లాడుతుంటారు. కానీ, సరైన అవగాహన లేకపోతే ఈ సులువైన రుణం కాస్తా, తీరని ఆర్థిక ఊబిగా మారే ప్రమాదం ఉందని ఆర్థిక నిపుణులు హెచ్చరిస్తున్నారు. వ్యక్తిగత రుణం తీసుకునే ముందు సామాన్యులు తప్పక గమనించాల్సిన 5 ముఖ్యమైన సూత్రాలు ఇవే!
1. వడ్డీ రేట్ల మాయాజాలం: 1% తేడాతో భారీ నష్టం
చాలామంది ఏజెంట్ల మాటలు నమ్మి వడ్డీ రేట్లను సరిపోల్చకుండా లోన్ తీసుకుంటారు. కేవలం 1% వడ్డీ పెరిగినా మీ జేబుకు ఎంత చిల్లు పడుతుందో ఈ లెక్క చూడండి. మీరు రూ. 5 లక్షల రుణాన్ని 5 సంవత్సరాల కాలపరిమితికి తీసుకున్నప్పుడు.. వడ్డీ రేటు కేవలం 1 శాతం పెరిగితే, ఏడాదికి సుమారు రూ. 3,000 అదనంగా భరించాలి. ఐదేళ్ల కాలంలో ఇది దాదాపు రూ. 14,000 అదనపు భారంగా మారుతుంది. అందుకే వివిధ బ్యాంకులను ముందే సరిపోల్చడం ముఖ్యం.
2. ఒక్క EMI ఎగవేస్తే.. 7 ఏళ్ల శాపం!
నెలవారీ వాయిదాలు (EMIs) సమయానికి చెల్లించకపోతే కేవలం పెనాల్టీ మాత్రమే కాదు, దానిపై జీఎస్టీ (GST) కూడా పడుతుంది. అంతకంటే ప్రమాదం ఏమిటంటే.. ఒక్క ఈఎంఐ చెల్లింపు ఆలస్యమైనా మీ సిబిల్ (CIBIL) స్కోరు 50 నుండి 70 పాయింట్ల వరకు దిగజారుతుంది. ఈ చేదు మార్కు మీ క్రెడిట్ రిపోర్టులో ఏకంగా 7 సంవత్సరాల పాటు అలానే ఉండిపోతుంది.
3. ప్రణాళిక లేని రుణం.. కోరి తెచ్చుకున్న సంకెళ్లు
ఆదాయ వనరులు, నెలవారీ బడ్జెట్ను లెక్కించకుండా అప్పు తీసుకుంటే భవిష్యత్తు అస్తవ్యస్తమవుతుంది. పర్సనల్ లోన్ డిఫాల్ట్ అయితే బ్యాంకులు బలవంతపు వసూళ్లకు దిగే అవకాశం ఉంది. ఫలితంగా భవిష్యత్తులో మీకు మరెక్కడా రూపాయి కూడా పుట్టని పరిస్థితి ఏర్పడుతుంది.
4. బహుళ రుణాల ఉచ్చు (Multiple Loans)
ఒక అప్పు తీర్చడానికి మరో అప్పు చేయడం లేదా ఒకేసారి ఎక్కువ రుణాలు తీసుకోవడం మిమ్మల్ని ‘అప్పుల చక్రవ్యూహం’లోకి నెట్టేస్తుంది. మీ సంపాదనలో ఎక్కువ భాగం ఈఎంఐలకే పోతే సంసారం గడవడం కష్టమవుతుంది. అత్యవసరమైతే తప్ప ఒకటికి మించి ఎక్కువ లోన్స్ తీసుకోకపోవడమే ఉత్తమం.
5. క్రెడిట్ రిపోర్ట్ చెకింగ్ & దరఖాస్తుల జాగ్రత్త
- హార్డ్ ఎంక్వైరీ: మీరు లోన్ కోసం ప్రతి బ్యాంకులోనూ అప్లై చేస్తుంటే, ప్రతిసారీ మీ సిబిల్ స్కోరు తగ్గుతుంది.
- సిబిల్ తప్పులు: క్రెడిట్ రిపోర్టును తరచూ చెక్ చేసుకోకపోతే, అందులో దొర్లే తప్పులు మీ స్కోరును పాడుచేస్తాయి. లోన్ అప్లై చేసే ముందే సిబిల్ తనిఖీ చేసుకుని, ఏవైనా తప్పులుంటే క్రెడిట్ బ్యూరోకు ఫిర్యాదు చేయాలి.
