సూపర్ హీరో సినిమాలకి తెలుగు ప్రేక్షకుల మద్దతు ఎంతగా ఉంటుందో మరోసారి నిరూపించింది తేజ సజ్జ నటించిన మిరాయ్. కేవలం ఎనిమిది రోజుల్లోనే ఈ సినిమా అమెరికా బాక్సాఫీస్‌లో $2.5 మిలియన్ దాటేసింది. ఇప్పుడు మూడు మిలియన్ మార్క్ వైపు దూసుకెళ్తోంది. ‘హనుమాన్’ తరువాత తేజ మరోసారి అమెరికా మార్కెట్‌లో అద్భుత రికార్డ్ సాధించాడంటే ఇది చిన్న విషయం కాదు. ఇంతవరకు ప్ర‌భాస్‌, ఎన్టీఆర్ లాంటి స్టార్ హీరోలే ఇలాంటి రికార్డులు క్రియేట్ చేశారు. ఆ లెజెండరీ లిస్ట్‌లోకి యంగ్ హీరో తేజ సజ్జ పేరు చేరడం నిజంగా గర్వకారణం.
దేశంలో కూడా మిరాయ్ ఊపే వేరుగా ఉంది. రిలీజ్ అయిన ఎనిమిదో రోజు మాత్రమే బుక్‌మైషోలో 1.2 లక్షల టికెట్లు అమ్ముడయ్యాయి. ఇది సినిమాకి ఎంతటి క్రేజ్ ఉందో స్పష్టంగా చూపిస్తోంది. మొత్తానికి ఈ వేగంతో మిరాయ్ ప్రపంచవ్యాప్తంగా రూ.150 కోట్ల గ్రాస్ వైపు దూసుకెళ్తోంది. ఇది తేజ కెరీర్‌లోనే అతిపెద్ద విజయంగా నిలిచిపోనుంది.
‘హనుమాన్’తోనే తేజ ఓవర్సీస్‌లో $2.5 మిలియన్ మార్క్ టచ్ చేశాడు. ఇప్పుడు మిరాయ్ తో కూడా అదే రికార్డ్ రిపీట్ చేసి, అదనంగా డొమెస్టిక్ బాక్సాఫీస్‌లోను దుమ్మురేపుతున్నాడు. దాంతో తేజ సజ్జ పేరుని సూపర్ హీరో జానర్‌లో ‘బ్యాంకబుల్ స్టార్’గా అభిమానులు, ట్రేడ్ వర్గాలు ముద్రవేశాయి.
టీజీ విశ్వప్రసాద్, కృతి ప్రసాద్ నిర్మించిన ఈ చిత్రం నిర్మాతలకు భారీ లాభాలు తెచ్చిపెట్టింది. డిస్ట్రిబ్యూటర్లు, ఎగ్జిబిటర్లు, బయ్యర్లు అందరూ సూపర్ ప్రాఫిట్స్‌తో సంతోషంగా ఉన్నారు.
కార్తిక్ ఘట్టమనేని దర్శకత్వంలో వచ్చిన ఈ చిత్రం విజువల్స్, గ్రాండ్ స్కేలు, ఎంగేజింగ్ స్టోరీటెల్లింగ్ వల్ల ప్రేక్షకుల నుంచి, క్రిటిక్స్ నుంచి కూడా ప్రశంసలు అందుకుంటోంది. రెండో వారం కూడా ఇదే రీతిలో దూసుకుపోతుందని ట్రేడ్ వర్గాలు అంచనా వేస్తున్నాయి. 2025లో డిఫైనింగ్ బ్లాక్‌బస్టర్స్‌లో ఒకటిగా మిరాయ్ నిలవడం ఖాయమని సినీ వర్గాల మాట.
