వాస్తు, ఫెంగ్షుయ్, జ్యోతిష్య శాస్త్రాలు మన జీవనశైలిలో సానుకూల మార్పులు తీసుకురావడంలో కీలక పాత్ర పోషిస్తాయని పెద్దలు చెబుతుంటారు. అందులో భాగంగానే ఇంట్లో ఉంచే కొన్ని విగ్రహాలు, శిల్పాలు ధనప్రాప్తికి, స్థిరత్వానికి దోహదపడతాయని విశ్వాసం. అలాంటి వాటిలో ఒంటె విగ్రహానికి ప్రత్యేక ప్రాధాన్యం ఉంది. ఎడారుల్లో కష్టాలను తట్టుకుని ముందుకు సాగే ఒంటె, ఓర్పు, సహనం, నిరంతర శ్రమకు ప్రతీకగా భావిస్తారు. అందుకే వాస్తు ప్రకారం ఇంట్లో ఒంటె విగ్రహాన్ని ఉంచుకోవడం శుభ ఫలితాలను ఇస్తుందని అంటారు.
ప్రధానంగా ధనాకర్షణ, వ్యాపార అభివృద్ధి, కెరీర్లో స్థిరత్వం కోరుకునేవారికి ఒంటె విగ్రహం అనుకూలమని నిపుణులు సూచిస్తున్నారు. ఇంట్లో ఈ విగ్రహాన్ని ఉంచేటప్పుడు సరైన దిశ చాలా ముఖ్యం. వాయువ్య దిశను ఉత్తమంగా భావిస్తారు. ఇది సాధ్యంకాకపోతే తూర్పు లేదా ఉత్తర దిశలో లివింగ్ రూమ్ లేదా డ్రాయింగ్ రూమ్లో ఉంచవచ్చు. అలా ఉంచినప్పుడు ఇంటి వాతావరణం ప్రశాంతంగా మారి, కుటుంబ సభ్యుల మధ్య అనుకూల శక్తి పెరుగుతుందని విశ్వాసం.
ఒంటె విగ్రహాన్ని ఎప్పుడూ జంటగా ఉంచడం మంచిదిగా భావిస్తారు. ఇది భాగస్వామ్య వ్యాపారాలకు, ఉద్యోగ పురోగతికి సహకరిస్తుందని చెబుతారు. అయితే కొన్ని నియమాలను తప్పనిసరిగా పాటించాలి. బెడ్రూమ్, బాత్రూమ్, మెట్ల కింద, నేలపై లేదా ప్రధాన ద్వారం ముందు ఒంటె విగ్రహాన్ని ఉంచకూడదు. అలాగే విగ్రహం ముఖం ఇంటి లోపలి వైపు ఉండేలా చూసుకోవాలి.
ఇత్తడి లేదా రాగితో చేసిన ఒంటె విగ్రహం అత్యంత శుభప్రదం. అది లభించకపోతే చెక్క లేదా రాతితో చేసినదైనా సరే, కానీ విరిగిన విగ్రహాన్ని మాత్రం ఇంట్లో ఉంచకూడదు. విగ్రహం పరిమాణం మధ్యస్థంగా ఉండటం మంచిది. పెద్దదైనా చిన్నదైనా వాస్తు లోపాలు కలగవచ్చని నమ్మకం.
సరైన విధంగా, సరైన స్థానంలో ఒంటె విగ్రహాన్ని ఉంచుకుంటే జీవితంలో ఎదురయ్యే ఆటంకాలు క్రమంగా తొలగిపోతాయని, ఆదాయం పెరిగి, అవకాశాలు మెరుగవుతాయని విశ్వాసం. అందుకే నేటి జీవనశైలిలో వాస్తు సూచనలను పాటిస్తూ ఇలాంటి చిన్న మార్పులు చేసుకుంటే, మనసుకు ప్రశాంతతతో పాటు భవిష్యత్తుపై ధైర్యం కూడా పెరుగుతుంది.
