ఈ ఆధునిక యుగంలో విజయం అంటే ఎక్కువ మంది ధనం, పదవి, పేరు ప్రతిష్ట వంటి విషయాలను మాత్రమే చూస్తారు. కానీ ఇవన్నీ ఒక్క సారి మనకి వచ్చినా శాశ్వత సంతృప్తిని ఇవ్వవు. నిజమైన విజయం అంటే బాహ్య విజయంతో పాటు అంతర్ముఖ శాంతి. ఈ రెండూ కలిస్తేనే నిజమైన విజయం. నిజమైన విజయం సాధించాలంటే దానికి ఆధ్యాత్మకత తోడవ్వాలి. ఇక్కడే ఆధ్యాత్మికత కీలక పాత్రను పోషిస్తుంది. ఆధ్యాత్మికత తోడుగా ఉంటే ఎలాంటి విజయాలు సాధించవచ్చో ఇప్పుడు తెలుసుకునే ప్రయత్నం చేద్ధాం.
లక్ష్యాన్ని స్పష్టంగా చూపించే దీపం
ప్రతి మనిషి జీవితంలో ఒక దశలో “నేను దేని కోసం బతుకుతున్నాను?” అనే ప్రశ్న తలెత్తుతుంది. ఆ ప్రశ్నకు జవాబు చెప్పగలిగేది ఆధ్యాత్మికత మాత్రమే. ఆధ్యాత్మికంగా ఉన్నవారు విజయాన్ని కేవలం పదవిగా కాక, ఆత్మపరిపూర్ణతగా చూస్తారు. దాంతో వారి ప్రవర్తనలో స్పష్టత, చర్యల్లో చిత్తశుద్ధి, నడిచే దారిలో ధైర్యం కనబడతాయి.
మనం ముందుకు సాగేందుకు మానసిక శాంతి అవసరం
ఒక్కోసారి మనం బాగా పని చేస్తున్నా, మనస్సు అశాంతిగా ఉంటే… ఆ పని నుంచి కూడా సంతృప్తి ఉండదు. ఆధ్యాత్మిక సాధనలైన ధ్యానం, జపం, ప్రార్థన మనస్సును శాంతంగా ఉంచి, విపత్కాలంలో కూడా స్థిరంగా ఉండే శక్తిని ఇస్తాయి. సంతృప్తికరమైన జీవనం మనిషిని సన్మార్గంలో నడిపిస్తుంది. సమాజంలో గుర్తింపు వచ్చేలా చేస్తుంది.
ధర్మబద్ధమైన జీవనశైలి… దీర్ఘకాలిక విజయానికి మేలైన మార్గం
ఆధ్యాత్మికత మనలో సత్యం, ధర్మం, దయ, క్షమ వంటి విలువలను పెంపొందిస్తుంది. ఈ విలువల ఆధారంగా నడిచే వ్యక్తి నడక నెమ్మదిగానైనా అడుగడుగునా గౌరవాన్ని, శ్రేయస్సును, ఆత్మబలాన్ని సంపాదిస్తాడు. ఇలా సాధించిన విజయాలు చరిత్రను సృష్టిస్తాయి. చరిత్రలో తనకంటూ ప్రత్యేకంగా కొన్ని పేజీలను ఏర్పాటు చేసుకుంటాయి.
ఆత్మవిశ్వాసానికి మూలం.. నమ్మకంగా ముందుకు నడిపించే శక్తి
ఆధ్యాత్మికత ఉన్నవారు ఫలితాలపై మక్కువ లేకుండా కృషి చేస్తారు. వీరి దృక్కోణం: “నేను నా కర్తవ్యాన్ని సత్పథంలో చేయాలి – ఫలితాలు దేవుని దయ.” ఇది వారికి భయరహితంగా, నిశ్చింతగా పని చేయగలిగే ఆత్మవిశ్వాసాన్ని కలిగిస్తుంది. పని ప్రారంభించే ముందే ఫలితాలను ఆశించేవారు, ఫలితాల గురించి నిరంతరం ఆలోచన చేసేవారు కర్తవ్యాన్ని అకుంఠిత దీక్షతో చేయలేరు.
అహంకార నియంత్రణ – విజయాన్ని వినయంగా నిలుపుకోవడం
విజయం వచ్చినప్పుడు మనిషి గర్వంతో గాల్లో విహరిస్తాడు. కానీ ఆధ్యాత్మికత అతనిలో వినయాన్ని, కృతజ్ఞత భావాన్ని బలంగా నాటుతుంది. “నా శ్రమకి ఫలితం రావడమూ, దానికి సహకరించిన సందర్భాలూ దేవదయ,” అని అర్థం చేసుకుని జీవిస్తాడు. ఇంకా సింపుల్‌గా చెప్పాలంటే దేవుని దయ లేకుంటే నేను ఏదీ చేయలేను అని అనుకోవాలి.
శాంతియుత జీవితం.. నిజమైన విజయం
చివరికి ప్రతి మనిషి కోరేది శాంతి. శాంతి లేకపోతే ఎన్ని కోట్లు సంపాదించినా, ఎన్ని గౌరవాలు వచ్చినా, మనసు వెలితిగానే ఉంటుంది. ఆధ్యాత్మికత మనిషికి ఆ మనశ్శాంతిని అందిస్తుంది. అది పొందినవాడు – విజయాన్ని అనుభవించగలడు. తన విజయాన్ని అందరికీ పంచగలడు. విజయాన్ని నిలుపుకోగలడు.
ఆధ్యాత్మకత మనిషి విజయంలో పోషించే పాత్రను గురించి భగవద్గీత ఓ సందర్భంలో అద్భుతమైన శ్లోకాన్ని అందించింది. యోగః కర్మసు కౌశలం అంటుంది గీత. అంటే నిష్కామంగా కర్తవ్యాన్ని నిర్వర్తించాలి. అదే నిజమైన యోగం. అదే నిజమైన విజయం. ఈరోజుల్లో తాత్కాలికమైన విజయాల కోసం పరుగుతు తీస్తున్నారు. తాత్కాలికమైనదే అసలైన విజయం అని సంబరపడిపోతున్నాం. ఈ విజయం నిజమైనదిగా మారాలంటే కావలసినంది ఆధ్యాత్మికత. ఆధ్యాత్మికత అంటే ఒక మత విశ్వాసం కానేకాదు. ఇది మన అంతరంగ వికాసానికి ఒక మార్గం మాత్రమే. రోజూ మనం ఎన్నో ఆలయాలను సందర్శిస్తూ పూజిస్తూ ఉంటాం. కొంతమంది ఆలయాలను నిర్మిస్తూ ఉంటారు. ఇవి ఎన్ని చేసినా అంతరాత్మ ప్రశాంతంగా లేకుంటే జీవితం అసంపూర్ణమే అవుతుంది. మనం చేస్తున్న పనిలో నిజమైన విజయం సాధించాలంటే తప్పకుండా మనం అంతరాత్మక శక్తిని పెంచుకోవాలి. అప్పుడే నిత్య చైతన్యంతో కూడిన విజయం సాధిస్తాం. భూమి ఉన్నంత వరకు ఆ విజయం నిలిచిపోతుంది.
