అవధానాల్లో అప్రస్తుత ప్రసంగి వేసే కొంటె ప్రశ్నలకి అవధాని అంత కంటే కొంటెగా సమాధానం చెప్తే మంచి హాస్యం పుడుతుంది. అలాంటి కొన్ని ఉదాహరణలు మీ కోసం:
1.ప్రశ్న:-అవధానం చేసే వారికి చప్పట్లంటే చాలా ఇష్టమంట కదా! మరి మీకో..
జవాబు :- నాకు చప్పట్లు ఇష్టం వుండవు. నాకు కారం అట్లంటేనే ఇష్టం
2. ప్రశ్న:- పద్యానికి, శ్లోకానికి తేడా ఏమిటి?
జవాబు :- పద్యం వేగంగా వస్తుంది. శ్లోకం నెమ్మదిగా వస్తుంది. ఎందుకంటే స్లో…కమ్ కదా
3 ప్రశ్న: పెళ్లి కాకముందు వధువు, పెళ్లి అయ్యాక భార్య ఎలా కనిపిస్తుంది.
జవాబు :– పెళ్లి కాకముందు ‘అయస్కాంతంలా’, పెళ్లి అయ్యాక సూర్యకాంతంలా…’
4. ప్రశ్న:-ఉగాది కవి సమ్మేళనానికి కవితలను తీసుకురమ్మన్నారు.
జవాబు:- ఇంతకీ ఏ కవి ‘తలను’ తీసికెళ్తున్నారు
5.ప్రశ్న:-పెళ్లికి వెళ్లుతూ పిల్లిని చంకన పెట్టుకొని వెళ్లటమంటే ఏమిటి?
జవాబు :-అవధానానికి వెళ్లుతూ అప్రస్తుత ప్రసంగిని వెంట పెట్టుకొని వెళ్లటం.
6 ప్రశ్న:-అవధానాలను నిషేధించే పని మీకు అప్పజెప్పితే ఏం చేస్తారు?
జవాబు :-దశల వారిగా చేస్తాను. ముందు అప్రస్తుత ప్రసంగాన్ని నిషేధిస్తాను
7. ప్రశ్న:- అవధానికి ఆశువులు ఎప్పుడొస్తాయి, అశ్రువులు ఎప్పుడొస్తాయి.
జవాబు :- ప్రశ్నవేస్తే ఆశువులు వస్తాయి. అవధానం జరిగి సత్కారం ఎగరగొడితే అశ్రువులు వస్తాయి.
8. ప్రశ్న:- బోడిగుండుకు, మోకాలికి ముడిపెడతారెందుకు?
జవాబు :- రెండింటి మీద అంతగా వెంట్రుకలు వుండవు కాబట్టి.
9. ప్రశ్న:- మీకు రంభనిస్తే ఏం చేస్తారు?
జవాబు:- ఆనందంగా ఇంటికి తీసికెళ్లి ఆకలి తీర్చుకుంటాను. రంభ అంటే అరటిపండు (రంభాఫలం) అని అర్థం.
10. ప్రశ్న:- నాకీ మధ్య శ్రీకృష్ణుడిపై భక్తి పెరిగిపోతోంది. ఆయనలాగే ప్రవర్తించమంటారా…
జవాబు:- మీ ఆవిడకు ద్రౌపదిపై భక్తి పెరగకుండా చూసుకోండి.
11. ప్రశ్న:- మీ మైకులో బాంబు పెడితే ఏం చేస్తారు.
జవాబు:- వెంటనే ఆ మైకు అప్రస్తుత ప్రసంగీకుడికి ఇచ్చి మాట్లాడమంటాను.
12. ప్రశ్న:- మీరెప్పుడైనా బూతు పనులు చేశారా.
జవాబు: – ప్రభుత్వ ఉద్యోగిని కదా ఎన్నికల్లో పోలింగ్ బూతు పనులు’ తప్పవు
13 ప్రశ్న:-అర్ధనారీశ్వరుడైన ఈశ్వరుడు ధరించే వస్త్రం ఏమిటి?
జవాబు:- ఈశ్వరుడు కనపడేలా కో ‘బ్రా’ ను మెడలో ధరిస్తాడు
14. ప్రశ్న:- అవధాని గారు మీది వర్ణాంతర వివాహమట.. నిజమా?
జవాబు:- నిజమే నేను నల్లగా వుంటాను, మా ఆవిడ తెల్లగా వుంటుంది.
15. ప్రశ్న:- పావురం అంటే మీకు ఇష్టమా…
జవాబు:- పావు ‘రమ్’ ఎవరికి ఇష్టం వుండదు
16. ప్రశ్న:- మీరు సారా త్రాగుతారా.
జవాబు:- అవును అవధాన కవితామృతాన్ని మన ‘సారా’ త్రాగుతాను.
17. ప్రశ్న:- సన్యాసికి, సన్నాసికి తేడా ఏమిటి?
జవాబు:- అందర్ని వదిలేసిన వాడు సన్యాసి, అందరూ వదిలేసిన వాడు సన్నాసి.
18. ప్రశ్న:- మీకు వాణిశ్రీ అంటే ఇష్టమా..
జవాబు:- చాలా ఇష్టం. వాణి అంటే సరస్వతి -జ్ఞానం, శ్రీ అంటే సంపద కాబట్టి.
19. ప్రశ్న: – రైలు పట్టాలకు, కాలి పట్టీలకు అనుబంధం ఏమిటి?
జవాబు:- రైలు, పట్టాల మీద వుంటుంది. పట్టీలు, కాలి మీద వుంటాయి.
20. ప్రశ్న:- సభలో ఎవరైనా ఆవులిస్తే మీరేమి చేస్తారు?
జవాబు:- పాలిచ్చేవైతే యింటికి తోలుకెళ్తా.
21. ప్రశ్న:- పురుషులందు పుణ్యపురుషులు వేరయా! అన్నాడు వేమన. మరి మీరేమంటారు?
జవాబు:- పురుషులందు పుణ్యపురుషులు ‘ఏరయా!’
22. ప్రశ్న:- అవధానిగారు ఇక్కడికి రంభ, ఊర్వశి, మేనక, తిలోత్తమ వస్తే మీరేం చేస్తారు?
జవాబు:- మరో నలుగుర్ని పిలిచి ‘అష్టావధానం’ చేస్తాను.
23. ప్రశ్న:- పెళ్లయిన మగవారిని ఏమీ అనరు. కానీ పెళ్లయిన ఆడవాళ్లను ‘శ్రీమతి’ అంటారెందుకు?
జవాబు:- పెళ్లయిన తరువాత ‘స్త్రీ మతి’ స్థితిమతి మీదే పురుషులు ఆధారపడుతారు గనుక.
24. ప్రశ్న:- ప్రేమికుడికి, భర్తకు ఏమిటి తేడా గురువు గారు.
జవాబు:- గొడవపడితే మాట్లడదేమోనని
భయపడేవాడు ప్రేమికుడు..
మాట్లాడితే గొడవ పడుతుందేమోనని
భయపడేవాడు భర్త…
25 ప్రశ్న:- అవధానిగారు కీర్తిశేషుల పెండ్లిపత్రిక వచ్చింది. పెళ్లికి వెళ్లమంటారా?
జవాబు:- తప్పకుండా వెళ్లు. కీర్తిశేషులంటే…
‘కీర్తి’ అమ్మాయి పేరు,
‘శేషు’ అబ్బాయి పేరు.
26. ప్రశ్న:- గురువుగారు మా మొదటి అమ్మాయి పేరు దీపిక, రెండవ అమ్మాయి పేరు గోపిక. మరి మూడో అమ్మాయి పుడితే ఏ పేరు పెట్టాలి?
జవాబు: – ‘ఆపిక’ వెంటనే అవధాని సమాధానం.
ఎలా ఉన్నాయ్??? హాయిగా నవ్వుకున్నారు కదా…
