ప్రభాస్ గురించి తెలిసిన ప్రతి ఒక్కరికీ ఒక విషయం బాగా తెలుసు – ఆయనకు మంచి భోజనం అంటే అమితమైన ఇష్టం. తాను ఇష్టపడే వంటకాల విషయంలో ఆయన ఎలాంటి రాజీ పడరు. అంతేకాదు, తనతో కలిసి పనిచేసే వారికి కూడా రుచికరమైన భోజనం అందించడంలో ఎంతో ఆనందం పొందుతారు. పలుమార్లు ఆయనతో నటించిన సహనటులు, టెక్నీషియన్లు సెట్స్కు ప్రభాస్ పంపించే భారీ ఫుడ్ పార్సెల్స్ గురించి ఆసక్తికర సంఘటనలు పంచుకున్నారు.
ఇంటి వంటల రుచుల నుంచి మొదలుకొని, వివిధ వంటకాలతో నిండిన విందుల వరకు… ప్రభాస్ భోజనంపై చూపే శ్రద్ధ ప్రత్యేకం. ఆయన సెట్స్లో ఉన్నవారంతా తృప్తిగా తినాలని చూసే వ్యక్తి. ఆయన ఔదార్యం గురించి ఇండస్ట్రీలో ప్రత్యేకంగా చెప్పుకుంటారు.
అయితే ఇటీవల ప్రభాస్ చెప్పిన ఒక సంఘటన ఆయన ఫుడ్పై ఉన్న ప్రేమను మరో స్థాయికి తీసుకెళ్లింది. ముంబైలో ‘ఆదిపురుష్’ సినిమా షూటింగ్ జరుగుతున్న సమయంలో దర్శకుడు ఓం రౌత్కు అసలైన చెన్నై వంటకాలు తినిపిస్తానని ప్రభాస్ మాట ఇచ్చారట. అదే సమయంలో ఆయనకు ‘చీట్ డే’ కావడంతో, సాధారణంగా కాకుండా ప్రత్యేకంగా ఏదైనా చేయాలని నిర్ణయించుకున్నారు.
సాధారణంగా ముంబైలోనే ఆ వంటకాలు ఏర్పాటు చేయించుకోవచ్చు. కానీ ప్రభాస్ అలా చేయలేదు. చెన్నై నుంచే ప్రత్యేకంగా ఆహారం ఆర్డర్ చేశారు. అక్కడే తాజాగా వండిన వంటకాలను ప్రత్యేకంగా తీసుకురావడానికి ఒక వ్యక్తి విమానంలో చెన్నై నుంచి ముంబైకి వచ్చాడట. ఆ వ్యక్తి ఆహారం సరైన విధంగా వేడి చేసి, నేరుగా షూటింగ్ సెట్స్కు అందించాడని సమాచారం.
ఈ విషయం తెలుసుకున్న ఓం రౌత్ ఆశ్చర్యానికి గురయ్యారట. కేవలం ఒక లంచ్ కోసం ఎవరో ఒకరు మరో రాష్ట్రం నుంచి ప్రయాణం చేయడం ఆయనకు నమ్మశక్యం కాలేదట. ప్రభాస్ ఈ సంఘటనను చెప్పిన వీడియో ఇప్పుడు సోషల్ మీడియాలో వైరల్ అవుతోంది. తనకు ఇష్టమైన ఆహారం కోసం ప్రభాస్ ఎంతదూరమైనా వెళ్తారనే విషయం అభిమానులను ఒకేసారి ఆశ్చర్యపరిచింది, అలరించింది కూడా.
