ఝార్ఖండ్లోని లతేహార్ జిల్లాలో ఉన్న బార్వాగఢ గ్రామం దేశంలోనే ఒక విశిష్టమైన ఊరుగా పేరుపొందింది. కారణం—ఇక్కడ ఒక్కరూ మాంసాహారం తినరు. పెద్దలు, పిల్లలు, కుటుంబాలు… మొత్తం గ్రామస్తులు శాకాహారులే. మాంసాన్ని ముట్టుకోకపోవడం మాత్రమే కాదు, స్కూల్లలో కూడా గుడ్లకు బదులుగా పిల్లలకు పండ్లు ఇస్తారు. ఇది విన్నవారెవరికైనా ఆశ్చర్యమే.
ఈ ప్రత్యేక ఆచారానికి ప్రధాన కారణం—తానా భగత్ సమాజం. ఈ సమాజానికి చెందిన ప్రజలు మహాత్మ గాంధీ సిద్ధాంతాలను కచ్చితంగా అనుసరిస్తారు. గాంధీగారి అహింసా మార్గాన్ని గౌరవిస్తూ మాంసాహారాన్ని పూర్తిగా వదిలేశారు. చాలాకాలంగా కొనసాగుతున్న ఈ సంప్రదాయాన్ని నేటి తరమూ అదే భక్తితో పాటిస్తూనే ఉంది. శాకాహారం వల్ల శరీరం, మనస్సు రెండూ పవిత్రంగా, ఆరోగ్యంగా ఉంటాయని వీరి నమ్మకం.
బార్వాగఢ ప్రజల ప్రకారం, వారి గ్రామంలో తీవ్రమైన అనారోగ్యాలు చాలా అరుదు. స్వచ్ఛమైన, ఇంట్లో వండిన ఆహారమే తినడం వల్ల పిల్లలు కూడా ఆరోగ్యంగా ఉంటారని చెబుతున్నారు. రెస్టారెంట్ ఆహారానికీ పిల్లలు దూరంగా ఉంటారు. గ్రామ స్కూల్లో కూడా ప్రభుత్వ నిబంధన ప్రకారం గుడ్లు తినని విద్యార్థులకు మాత్రమే పండ్లు ఇస్తున్నారు.
స్థానిక వైద్యులు కూడా శాకాహారం వల్ల జీర్ణశక్తి మెరుగుపడటం, గ్యాస్, కాలేయం, కిడ్నీ సమస్యలు తగ్గడం వంటి ప్రయోజనాలు ఉన్నాయని చెబుతున్నారు. ‘మీ ఆహారం మీ మానసిక స్థితిని నిర్ణయిస్తుంది’ అన్న మాటను బార్వాగఢ గ్రామం నిజం చేస్తోంది. మొత్తం గ్రామం కలిసి అనుసరిస్తున్న ఈ శాకాహారపు సంస్కృతి భారతదేశంలోనే ఒక అరుదైన ఉదాహరణగా నిలిచింది.