దేశవ్యాప్తంగా పెట్రోల్, డీజిల్ ధరలు మరోసారి పెరగడంతో సామాన్య ప్రజలపై అదనపు భారం పడింది. ప్రభుత్వ రంగ చమురు సంస్థలు లీటర్ పెట్రోల్పై 87 పైసలు, డీజిల్పై 91 పైసలు పెంచుతూ తాజా ధరలను ప్రకటించాయి. కొత్త ధరలు శనివారం ఉదయం నుంచే అమల్లోకి వచ్చాయి. కేవలం పది రోజుల వ్యవధిలోనే ఇది మూడోసారి ధరల పెంపు కావడం గమనార్హం.
దేశ రాజధాని దిల్లీలో లీటర్ పెట్రోల్ ధర రూ.98.64 నుంచి రూ.99.51కు చేరుకోగా, డీజిల్ ధర రూ.91.58 నుంచి రూ.92.49కి పెరిగింది. ఇతర ప్రధాన నగరాల్లో కూడా ఇదే స్థాయిలో ధరలు పెరిగే అవకాశం ఉందని చమురు రంగ వర్గాలు చెబుతున్నాయి. గత వారం రోజుల్లోనే పెట్రోల్, డీజిల్ ధరలు దాదాపు రూ.5 వరకు పెరగడం వాహనదారులను ఆందోళనకు గురిచేస్తోంది.
పశ్చిమాసియా దేశాల్లో కొనసాగుతున్న ఉద్రిక్త పరిస్థితులు అంతర్జాతీయ మార్కెట్లో ముడి చమురు ధరలను భారీగా పెంచుతున్నాయి. దీంతో చమురు దిగుమతులపై ఆధారపడే భారతదేశంలో కూడా ఇంధన ధరలు వరుసగా పెరుగుతున్నాయి. ఇంధన ధరల పెరుగుదలతో రవాణా ఖర్చులు అధికమై, కూరగాయలు, నిత్యావసర సరుకుల ధరలపై కూడా ప్రభావం పడే అవకాశం ఉందని ఆర్థిక నిపుణులు హెచ్చరిస్తున్నారు. ప్రస్తుతం పెరుగుతున్న ఇంధన ధరలు మధ్యతరగతి కుటుంబాల నెలవారీ ఖర్చులపై స్పష్టమైన ప్రభావం చూపిస్తున్నాయి.
