బిగ్‌ అలర్ట్ః పెట్రోల్‌ డీజిల్‌ ధరలు పెరగబోతున్నాయా?

పశ్చిమాసియాలో ముదురుతున్న యుద్ధ మేఘాలు ప్రపంచ దేశాలను వణికిస్తున్నాయి. ముఖ్యంగా అంతర్జాతీయ మార్కెట్‌లో ముడిచమురు ధర బ్యారెల్‌కు 120 డాలర్ల మార్కును తాకడంతో, భారత్‌లో పెట్రోల్, డీజిల్ ధరలు ఎప్పుడు పెరుగుతాయో అన్న ఆందోళన సామాన్యుల్లో మొదలైంది. అయితే, కేంద్ర ప్రభుత్వం ప్రస్తుతానికి ఒక వ్యూహాత్మక నిర్ణయంతో సామాన్యుడిపై భారం పడకుండా కాపాడుతోంది. పెట్రోల్, డీజిల్‌పై లీటరుకు రూ. 10 చొప్పున ఎక్సైజ్ సుంకాన్ని తగ్గించిన ప్రభుత్వం, ఆ వెసులుబాటును ప్రజలకు బదిలీ చేయకుండా ప్రభుత్వ రంగ చమురు సంస్థలైన IOCL, BPCL, HPCLలకు కేటాయించింది. దీనివల్ల అంతర్జాతీయ ధరల పెరుగుదల వల్ల ఈ సంస్థలు చవిచూస్తున్న నష్టాలు రోజుకు రూ. 2,400 కోట్ల నుండి రూ. 1,600 కోట్లకు తగ్గాయి.

ప్రభుత్వ సంస్థలు ధరలను స్థిరంగా ఉంచినప్పటికీ, ప్రైవేట్ చమురు కంపెనీలు మాత్రం ఇప్పటికే బాదుడు మొదలుపెట్టాయి. ఏప్రిల్ 1వ తేదీ నుండి షెల్ ఇండియా పెట్రోల్ ధరను లీటరుకు రూ. 7.41, డీజిల్‌ను ఏకంగా రూ. 25.01 పెంచి షాక్ ఇచ్చింది. నయారా ఎనర్జీ కూడా పెట్రోల్‌పై రూ. 5, డీజిల్‌పై రూ. 3 పెంచుతూ నిర్ణయం తీసుకుంది. ప్రస్తుతం దేశ రాజధాని ఢిల్లీలో పెట్రోల్ ధర రూ. 94.77 వద్ద ఉండగా, హైదరాబాద్‌లో రూ. 107.45 వద్ద కొనసాగుతోంది. అలాగే డీజిల్ ధర హైదరాబాద్‌లో రూ. 95.70గా ఉంది.

నిపుణుల విశ్లేషణ ప్రకారం, ప్రభుత్వం ప్రస్తుతం ఎన్నికల దృష్ట్యా ధరలను పెంచకుండా నియంత్రిస్తోంది. కానీ అంతర్జాతీయంగా చమురు సంక్షోభం ఇలాగే కొనసాగితే, భవిష్యత్తులో లీటరుకు కనీసం రూ. 5 నుండి రూ. 10 వరకు పెరిగే అవకాశం ఉందని ఊహాగానాలు వినిపిస్తున్నాయి. క్రూడ్ ఆయిల్ ధరలు భారత్‌లో రవాణా ఖర్చులను ప్రభావితం చేస్తాయి కాబట్టి, ఇంధన ధరలు పెరిగితే నిత్యావసర వస్తువుల ధరలు కూడా ఆకాశాన్ని తాకడం ఖాయం. ప్రస్తుతానికి సామాన్యుడికి ఇది ఊరటనిచ్చే అంశమే అయినప్పటికీ, రాబోయే రోజుల్లో ‘పెట్రో’ సెగ తగిలే సూచనలు స్పష్టంగా కనిపిస్తున్నాయి.