తస్సదియ్యా…దిగొస్తుందిరా అబ్బాయ్‌… బంగారం కొనేందుకు డబ్బులున్నాయా?

పసిడి ప్రేమికులకు ఇది నిజంగానే తీపి కబురు. గత కొన్ని రోజులుగా ఆకాశాన్ని తాకుతూ, సామాన్యుడికి అందనంత ఎత్తుకు చేరిన బంగారం, వెండి ధరలు ఒక్కసారిగా భారీగా దిగివస్తున్నాయి. కేవలం మూడు రోజుల్లోనే తులం బంగారంపై ఏకంగా రూ.7,500 వరకు ధర తగ్గడం మార్కెట్ వర్గాలను సైతం ఆశ్చర్యపరుస్తోంది.

జూన్ 12 నాటికి దేశీయ మార్కెట్లో 24 క్యారెట్ల 10 గ్రాముల బంగారం ధర రూ.1,45,630 వద్ద ఉండగా, 22 క్యారెట్ల బంగారం ధర రూ.1,33,490గా నమోదైంది. దేశ రాజధాని ఢిల్లీలో 24 క్యారెట్ల బంగారం ధర రూ.1,45,780గా ఉండగా, చెన్నైలో ఇది రూ.1,47,270కు చేరింది. దక్షిణాది నగరాల్లో ధరలు స్వల్పంగా ఎక్కువగా కనిపిస్తున్నాయి.

వెండి ధరల్లో కూడా తగ్గుదల కనిపిస్తోంది. హైదరాబాద్, విజయవాడ, చెన్నై, కేరళ ప్రాంతాల్లో కిలో వెండి ధర రూ.2,59,900 వద్ద ఉండగా, ఢిల్లీ, ముంబై, బెంగళూరు వంటి నగరాల్లో రూ.2,49,900 వద్ద ట్రేడవుతోంది.

ధరలు తగ్గడానికి అసలు కారణం ఇదేనా?

అంతర్జాతీయ మార్కెట్లో బంగారం ధరలు గత ఆరు నెలల కనిష్ట స్థాయికి పడిపోవడమే ఈ ఆకస్మిక తగ్గుదలకు ప్రధాన కారణం. సాధారణంగా భౌగోళిక రాజకీయ ఉద్రిక్తతలు పెరిగినప్పుడు బంగారం ధరలు పెరుగుతుంటాయి. కానీ ప్రస్తుత పరిస్థితి భిన్నంగా ఉంది.

ఇరాన్‌పై అమెరికా జరిపిన సరికొత్త దాడుల కారణంగా అంతర్జాతీయంగా ముడి చమురు (క్రూడ్ ఆయిల్) ధరలు ఒక్కసారిగా 2 శాతం పెరిగాయి. చమురు ధరల పెరుగుదల వల్ల ప్రపంచవ్యాప్తంగా ద్రవ్యోల్బణం పెరిగే ప్రమాదం ఉంది. దీనిని అదుపు చేయడానికి అమెరికా వంటి పెద్ద దేశాలు వడ్డీ రేట్లను దీర్ఘకాలం పాటు గరిష్ట స్థాయిలోనే కొనసాగించే అవకాశం కనిపిస్తోంది. శాంతి ఒప్పందం కుదరకపోతే ఇరాన్ భారీ మూల్యం చెల్లించుకోక తప్పదని అమెరికా అధ్యక్షుడు డొనాల్డ్ ట్రంప్ హెచ్చరించడం ఇన్వెస్టర్లలో సరికొత్త ఆందోళనలను రేకెత్తించింది. ఈ పరిణామాల నేపథ్యంలో పెట్టుబడిదారులు తమ వ్యూహాలను మార్చుకోవడంతో బంగారం మార్కెట్ ఒడిదుడుకులకు లోనవుతూ భారీగా క్షీణిస్తోంది.

ధరలు వేలల్లో తగ్గుముఖం పడుతుండటంతో, సామాన్యులు, వివాహాది శుభకార్యాల కొరకు బంగారం కొనాలనుకునే వారికి ఇది మంచి అవకాశంగా నిపుణులు భావిస్తున్నారు. అయితే అంతర్జాతీయ పరిణామాల నేపథ్యంలో మార్కెట్ మరింత స్థిరపడే వరకు గమనించి అడుగులు వేయడం ఉత్తమం.